Tha na sgoiltean air ais, tha oileanaich ag ullachadh airson tilleadh, agus tha na saor-làithean seachad. Tha sin a’ ciallachadh gu bheil bùthan-obrach FilmG a’ tòiseachadh a-rithist. 

Faodaidh duine sam bith a tha airson film a dhèanamh leum dìreach air beulaibh a’ chiutha. Ge bith an e buidheann no neach fa leth a th’ annad, ma tha beachd agad no ma tha thu airson do sgilean a leasachadh, ’s urrainn dhuinn do chuideachadh. 

Bidh bùthan-obrach a’ ruith gu deireadh na Samhna, ach tha an clàr-ama againn a’ lìonadh. Ge bith a bheil thu a’ riochdachadh àrd-sgoil, oilthigh, no coimhearsnachd, cuir fios thugainn no bi deiseil airson gnogadh a chluinntinn air an doras agad. 

Tha lìonra de dh’oidean aig FilmG a chuidicheas le bhith a’ toirt do lèirsinn beò, agus tha stuth agus bathar-bog againn a dh’ fhaodas tu a chleachdadh gus am bi bùthan-obrach a’ freagairt air na feumalachdan agad. 

Tha riaghailtean na farpais air an làrach-lìn againn, ach tha e furasta – cruthaich film nas giorra na còig mionaidean agus cuir a-steach e gu FilmG ro 8 Dùbhlachd 2023. Chan fheum na filmichean a bhith mun Ghàidhlig; ach a bhith sa Ghàidhlig. 

’S e ‘Mo Shealladh’ cuspair na bliadhna-sa. Chan eil ach aon roinn a’ cuimseachadh air seo, mar sin dèan am film agad mu rud sam bith a tha thu ag iarraidh – film a bhiodh tu fhèin airson fhaicinn! 

Airson liosta nan roinnean fhaicinn agus airson a chuir a-steach do FilmG, tadhail air www.filmg.co.uk no cuir fios thugainn aig filmg@astarmedia.scot. 

Tha FilmG, farpais nam film goirid Gàidhlig, a’ tòiseachadh air an 16mh bliadhna aca agus tha iad ag amas air luchd-proifeiseanta a lorg airson meadhanan na h-Alba san àm ri teachd.

Tha na farpaisean Fosgailte agus Òigridh a-nis beò, agus tha iad a’ toirt cuireadh do luchd-tagraidh cuspair na bliadhna-sa, ‘Mo Shealladh’ a rannsachadh. Airson pàirt a ghabhail, cruthaich film Gàidhlig fo chòig mionaidean a dh’fhaid agus cuir a-steach e ron cheann-latha san Dùbhlachd.

Thuirt Megan Dale, Manaidsear Pròiseict FilmG, “Tha sinne ag iarraidh sgeulachdan làidir, èibhinn, eagallach no dràmadach a tha a’ riochdachadh na Gàidhlig, beatha an latha an-diugh no mìneachadh cruthachail sam bith air ‘Mo Shealladh’.

“’S e fìor àrd-ùrlair a th’ ann am FilmG – àraichidh agus leasaichidh sinn filmeadairean agus seallaidh sinn na sgilean aca gu farpaiseach, a’ cruthachadh nam meadhanan Gàidhlig san àm ri teachd.”

Bidh tachartasan samhraidh a’ gabhail àite ann an Inbhir Nis, Dùn Èideann, agus bailtean eile, ag àrach co-obrachadh am measg Ghàidheil agus a’ tàladh filmeadairean ùra agus filmeadairean a tha air tilleadh. Nas fhaide air adhart sa bhliadhna, bidh an sgioba a’ lìbhrigeadh bhùthan-obrach air feadh na h-Alba às dèidh dhaibh adhartas a dhèanamh o chionn ghoirid ann an Canada tro Mhìos nan Gàidheal.

Tha FilmG a’ cur fàilte air tagraidhean thairis air na 16 roinnean aca, a’ tabhann raon de dhuaisean ùra agus leasaichte gus dèanamh cinnteach gum bi farpais inntinneach agus eadar-mheasgte ann. Ged a dh’fhaodadh ‘Mo Shealladh’ cruthachalachd a bhrosnachadh, thathas a’ sireadh filmichean de gach seòrsa agus cuspair, leis nach eil ach dà dhuais an urra ris a’ chuspair.

Thuirt Alison Bhrus, Manaidsear Conaltradh Bhranndaichean airson MG ALBA, leis a bheil FilmG, “Tha sinn air leth toilichte FilmG 16 a chur air bhog, agus leis an ath-leasachadh seo, tha sinn air bhioran tagraidhean na bliadhna-sa fhaicinn le faireachdainn ùr na farpaise.”

Gus na roinnean, riaghailtean agus riatanasan inntrigidh fhaicinn, no airson fios a chur gu sgioba FilmG, tadhail air www.filmg.co.uk. 

Bidh cuirm dhuaisean airson farpais chliùiteach na h-Alba, FilmG, a’ gabhail àite aig an Old Fruitmarket ann an Glaschu Diardaoin 16 Gearran, agus an tachartas beò air ais airson a’ chiad turas bho thràth ann an 2020.

Bidh na preasantairean Fiona NicCoinnich agus Niall Iain Dòmhnallach a’ tilleadh gu na duaisean am-bliadhna, an fharpais aig an robh an àireamh as motha de dh’inntrigidhean agus de bhòtaichean anns na roinnean bhòtaidh poblach.

Fhuaireadh còrr air 59,000 bhòt tro làrach-lìn FilmG, agus thèid buannaichean Duaisean Roghainn FilmG anns na farpaisean Òigridh is Fhosgailte ainmeachadh aig cuirm nan duaisean, a bharrachd air na 15 duaisean air an co-dhùnadh le panal de bhritheamhan neo-eisimeileach.

Tha FilmG air leth toilichte Ricochet, companaidh Warner Bros. International Television Production ainmeachadh mar an sponsair ùr airson roinn Film as Fheàrr na Farpais Fhosgailte, aon de na duaisean as mòr-chòrdte ann am farpais FilmG sam bith.

Thuirt Lisa Cox, Stiùiriche Gnothachais airson Ricochet, ann an Glaschu:

“Tha Ricochet air leth toilichte a bhith a’ toirt taic don duais seo aig FilmG, farpais agus iomairt a tha a’ tighinn gu dlùth ri ar miannan airson susbaint agus tàlant a leasachadh ann an Alba.

“Tha sinn an-còmhnaidh a’ coimhead ri rionnagan san àm ri teachd a lorg, an dà chuid air beulaibh agus air cùl a’ chamara, agus tha FilmG a’ leigeil leinn ar cuideachadh a’ lorg tàlant air feadh na h-Alba, gu sònraichte air a’ Ghàidhealtachd agus na h-Eileanan.”

Thuirt Murchadh MacSuain, Manaidsear Phròiseact FilmG:

“Tha e na deagh naidheachd do FilmG gu bheil sinn a’ cur fàilte air Ricochet agus Warner Bros. International Television Production na sponsair do aon de na duaisean as cliùitiche againn, agus tha mi cinnteach gum brosnaich e barrachd is barrachd filmeadairean Gàidhlig a dhol an sàs san fharpais san àm ri teachd.

“Tha sinn cho taingeil do Ricochet, mar phàirt de Warner Bros. International Television Production agus ar sponsairean FilmG gu lèir airson ar cuideachadh a’ comharrachadh bliadhna cho soirbheachail.”

Thuirt Alison Bruce, Manaidsear Conaltradh Bhranndaichean aig MG ALBA: “Tha MG ALBA gu math moiteil à FilmG agus tha a h-uile càil a tha e a’ coileanadh mar dhòigh air leth math airson ruigsinneachd agus leasachadh.

“Is e Duaisean FilmG aon de na cinn-latha as cudromaiche air a’ mhìosachan againn, agus tha sinn a’ coimhead air adhart ri bhith a’ comharrachadh cho soirbheachail ’s a tha ar coimhearsnachdan filmeadairean Gàidhlig.”

Thèid Duaisean FilmG a chumail aig an Old Fruitmarket ann an Glaschu Diardaoin 16 Gearran. Thèid sruth beò den tachartas a chraoladh, agus thèid prògram de phrìomh thachartasan a shealltainn air BBC ALBA agus BBC iPlayer an ath Dhihaoine (24 Gearran).

Airson liosta iomlan de na filmichean ainmichte, tadhail air làrach-lìn FilmG aig www.filmg.co.uk

—

Sponsairean FilmG:

Duais Roghainn FilmG (Òigridh) – Comhairle nan Eilean Siar

Film Aithriseach as Fheàrr – Glasgow City Council

Rionnag na Bliadhna – Urras Brosnachaidh na Gàidhlig

An Coltas as Fheàrr – Comhairle na Gàidhealtachd

An Duais Gàidhlig – Sabhal Mòr Ostaig

Buidheann Òg as Fheàrr – Fèisean na Gàidheal

Cluiche as Fheàrr (Òigridh) – Comunn na Gàidhlig

Film as Fheàrr (Òigridh) – Riaghaltas na h-Alba

Duais Roghainn FilmG (Fosgailte) – Edinburgh City Council

Film Dùthchais as Fheàrr – Bòrd na Gàidhlig

Duais a’ Ghnìomhachais – Loganair

Duais Cruthachaidh – Iomairt na Gàidhealteachd ‘s nan Eilean

Stiùiriche as Fheàrr – Mòd Phàislig 2023

Cluiche as Fheàrr (Fosgailte) – Fèis nam Meadhanan Ceilteach

Film as Fheàrr (Fosgailte) – Ricochet, Warner Bros. International Television Production

Sgriobt as Fheàrr – Acair

Film Oileanach as Fheàrr – XpoNorth

Tha FilmG, fèis fhilmichean goirid na Gàidhlig, air bliadhna air leth soirbheachail ainmeachadh leis an àireamh as motha de fhilmichean a chaidh a-steach a-riamh on chaidh a steidheachadh o chionn 15 bliadhna. 

Le 106 film a-staigh, ’s e FilmG 15 a’ bhliadhna as soirbheachail a th’ aig an fharpais bho thòisich e ann an 2008. 

Tha mìosan de sgrìobhadh, filmeadh agus deasachadh air gabhail àite air feadh na h-Alba, le luchd-obrach agus oidean FilmG a’ ruith còrr air 50 bùth-obrach agus tachartas ann an sgoiltean agus coimhearsnachdan air feadh na dùthcha. 

Anns a’ cho-fharpais Fhosgailte, rinn FilmG còrr is dùblachadh air na h-inntrigidhean an taca ris a’ bhliadhna roimhe, le 24 tagradh. 

Ann am farpais na h-Òigridh chaidh 82 film a-steach tro na h-oidhirpean mìorbhaileach a rinn sgoiltean, buidhnean coimhearsnachd agus àireamh iongantach de fhiolmadairean òga neo-eisimeileach. 

Tha FilmG, a tha le MG ALBA, fhathast na inneal leasachaidh deatamach airson BBC ALBA agus gnìomhachas nam meadhanan Gàidhlig fo stiùireadh ùr Astar Media, a ghabh thairis lìbhrigeadh a’ phròiseict as t-samhradh. 

Le fòcas air filmichean neo-eisimeileach agus cruthachadh slighean leasachaidh, tha Astar Media an dòchas FilmG a thoirt bho neart gu neart thairis air na bliadhnaichean ri thighinn. 

Thuirt Manaidsear Stiùiridh Astar Media, Murchadh MacSuain: “Tha sinn air ìre àrd a shuidheachadh a-nis airson FilmG, agus chan urrainn dhuinn feitheamh gus soirbheachadh na bliadhna-sa a chomharrachadh aig cuirm nan duaisean againn sa Ghearran. 

“Tha sinn air leth toilichte gu bheil an dòigh-obrach againn air obrachadh cho math, agus tha sinn air bhioran fiolmadairean na bliadhna seo a thoirt còmhla rinn air turas gus na meadhanan Gàidhlig agus innse sgeulachdan a dhèanamh nas làidire, agus iad uile a’ cleachdadh na Gàidhlig ann an suidheachadh co-aimsireil.” 

Chaidh iarraidh air fiolmadairean filmichean goirid a chruthachadh (fo 5 mionaidean) stèidhichte air a’ chuspair Buidhe, às deidh branndadh tarraingeach FilmG, le beachdachadh air filmichean thairis air 17 roinnean. 

Taghaidh pannal de bhritheamhan neo-eisimeileach a tha ag obair anns na meadhanan na filmichean a tha iad airson fhaicinn air a’ gheàrr-liosta anns gach roinn. 

Thuirt Manaidsear Conaltradh Bhranndaichean MG ALBA Alison Bruce: “’S math a rinn na fiolmadairean uile a chuir a-steach airson farpais FilmG na bliadhna-sa.  

“Tha e math a bhith a’ comharrachadh 15 bliadhna den fharpais leis an àireamh as motha de dh’inntrigidhean gu ruige seo agus tha sinn air ar togail leis an dealas iongantach a th’ aig gach neach a tha a’ gabhail pàirt.” 

Thèid Duaisean FilmG a chumail anns an Old Fruitmarket ann an Glaschu air Diardaoin, 16 Gearran 2023, a’ tilleadh gu tachartas beò airson a’ chiad turas ann an dà bhliadhna, le prògram prìomh thachartasan ri chraoladh air BBC ALBA. 

Tha filmichean a-nis rim faighinn air làrach-lìn FilmG (www.filmg.co.uk), le bhòt a’ phobaill a’ dol beò nuair a bhios na geàrr-liostaichean air an ainmeachadh tràth san Fhaoilleach.

Tha 5 Seconds of Summer a-mach à fasan. Dè mu dheidhinn 10 Diog de Bhuidhe?

Tha FilmG a’ toirt dhuibh an cothrom camara Insta360, a’ cosg còrr air £400, a bhuannachadh (Insta360 One X2). Chan eil agaibh ach ri bhidio 10 diog de dh’fhaid a dhèanamh a’ cleachdadh cuspair FilmG na bliadhna, an dath buidhe, ann an dòigh chruthachail.

A’ tòiseachadh an-diugh (Diciadain 21 Sultain 2022), tha mìos agaibh bhidio a chur thugainn. Faodaidh sibh a bhith cho cruthachail ’s a ghabhas agus taghaidh am britheamh dìomhair air leth againn cò tha air buannachadh.

Faodaidh tu ‘Buidhe’ a chleachdadh ann an dòigh sam bith a thogras tu – smaoinich mu dheidhinn liomaidean, bòtannan, ball teanais… mar as cruthachail a tha thu, is ann as fheàrr a nì thu.

Cuir a’ bhidio agaibh an àirde air na meadhanan sòisealta agaibh (no air na meadhanan sòisealta aig an sgoil, oilthigh, msaa, agaibh), agus lean is dèan like air na duilleagan againn gus am faic sinn iad.

Tha sinn @filmg_alba air TikTok agus Instagram, agus @filmgalba air Facebook agus Twitter.

Farpais a’ dùnadh 12f, 21 Dàmhair 2022.

Ma tha ceistean sam bith oirbh, cuiribh fios gu filmg@astarmedia.scot

Gur math a thèid leibh!

Mar a chuireas sibh a-steach:

• Cuir suas bhidio air na meadhanan sòisealta agad (no air duilleag a dh’fhaodas tu a chleachdadh – sgoil/oilthigh/buidheann) a tha mu 10 diog a dh’fhaid.
• Dèan tag air @filmg_alba air Instagram no TikTok, no @filmgalba air Facebook no Twitter.
• Dèan cinnteach gun cleachd thu na hashtags #FilmG #Buidhe #Gàidhlig.
• Like/Lean na meadhanan sòisealta againn.
• Tha an fharpais a’ dùnadh aig 12f, 21 Dàmhair 2022
• Tha sinn gu h-àraid a’ lorg bhidiothan ann an stoidhle portraid – (Tha an cruth a tha sinn a’ lorg aig Reels air Instagram agus TikTok.)
• An duais: https://www.insta360.com/product/insta360-onex2
• Taghaidh am britheamh againn am buannaiche agus taghaidh e/i a’ bhidio as cruthachaile.

Riaghailtean: 

Feumaidh farpaisich a bhith nas sine na 13 bliadhna airson pàirt a ghabhail san fharpais, agus feumaidh iad a bhith nas sine na 16 bliadhna gus a’ bhidio aca a chur air na meadhanan sòisealta aca, no ma iad nas òige na 16 bliadhna, feumaidh cead a bhith aca bho phàrant/neach-glèidhidh airson cunntas eile a chleachdadh.

Feumaidh farpaisich a bhith nan neach-fuirich laghail ann an Alba. 

Chan eil an fharpais fosgailte do luchd-obrach an neach-brosnachaidh (no an teaghlach faisg orra), an luchd-ionaid, no duine sam bith ceangailte ris an fharpais ann an dòigh phroifeasanta.

Tha an fharpais a’ fosgladh air 21 Sultain 2022 agus a’ dùnadh aig 12f (GMT) 21 Dàmhair 2022. Chan eil dleastanas aig Astar Media airson inntrigidhean a tha fadalach, air chall no anmoch. Cha tèid inntrigidhean nach eil deiseil no a tha do-leughte a ghabhail.

Thèid inntrigidhean a ghabhail ma thèid bhidio mu 10 diog de dh’fhaid a chur air TikTok, Instagram, Twitter no Facebook a tha a’ dèanamh tag air FilmG air na meadhanan sòisealta sin (@filmgalba air Facebook agus Twitter / @filmg_alba air Instagram agus TikTok). Chan eil os-mheud de dh’inntrigidhean ann airson cuideigin a tha a’ gabhail pàirt.

Feumaidh luchd-inntrigidh FilmG a leantainn air na meadhanan sòisealta a chleachd iad airson a’ bhidio aca fhoillseachadh. Bheir seo an cothrom dhuinn teachdaireachd a chur thuca gus dearbhadh gun d’ fhuair sinn a’ bhidio aca agus air eagal ’s gum bi feum air barrachd conaltraidh. Bidh britheamh na farpaise a’ taghadh an neach-inntrigidh a chleachd Buidhe anns an dòigh as cruthachaile mar bhuannaiche na farpaise 10 Diog Buidhe.

Thèid am buannaiche fhoillseachadh air na meadhanan sòisealta aig FilmG air Dihaoine 21 Dàmhair 2022. Le bhith a’ gabhail pàirt anns an fharpais, tha thu a’ toirt cead dhuinn seo a dhèanamh.

Chan eil an fharpais seo cleamhnaichte, an cois, no a’ faighinn sponsair bho gin de na meadhanan sòisealta a chaidh ainmeachadh gu h-àrd, no le Insta360.com.

Chan urrainnear rud eile fhaighinn an àite an duais a chaidh ainmeachadh, agus chan urrainnear fhaighinn mar airgead. Mura h-eil an duais againn airson adhbhar air choreigin, tha e ceadaichte dha Astar Media duais eile a thoirt seachad a tha den aon luach no nas àirde.

Tha an co-dhùnadh aig Astar Media dearbhte, agus cha tachair conaltradh sam bith eile mu dheidhinn.

Cuimhnichibh, le bhith a’ cur a-steach am bhidio seo, tha sibh a’ toirt barantas dha Astar Media gu bheil na tha sibh a’ cur a-steach mar an obair agaibh fhein agus nach eil e a’ briseadh a-steach air còraichean no prìobhaideachas cuideigin eile.

Mura h-eil e comasach dhan fharpais a’ ruith mar a bha dùil, airson adhbharan a leithid cron air sàillibh bhìoras air a’ choimpiutair, lìonra fònaichean a’ fàilligeadh, milleadh, eadar-mheadhan nach eil ceadaichte, foill, fàilligeadh teicnigeach, no adhbahran eile thar smachd Astar Media a tha a’ deanamh cuirb no cron air rianachas teàrainteachd, cothromachd, eanracas, no stiùir ceart na farpaise, tha còir aig Astar Media am farpais a chur dheth, a thoirt gu crìoch, atharrachadh no a chur gu bhall, no a’ cur an neo-bhrìgh air gin de na bhidiothan air an tug e buaidh.

’S ann le Astar Media a bhios na h-inntrigidhean. Thèid fiosrachadh pearsanta a chleachdadh a-mhàin le Astar Media airson na farpaise a rianachadh.

Tha còir aig Astar Media an inntrigidh a chur air na meadhanan sòisealta aig FilmG.

Ma tha ceistean sam bith agaibh, leigibh fios gu sgioba FilmG aig filmg@astarmedia.scot air neo Astar Media, Stornoway Business Hub, 9 Bank Street, Stornoway HS1 2XG.

Chaidh 15mh bliadhna de FilmG, fèis fhilmichean goirid na Gàidhlig, a chuir air bhog, an-diugh le amasan airson rionnagan gnìomhachas nam meadhanan ann an Alba sam àm ri teachd a lorg.

Chaidh tachartasan cur air bhog cuspair a chumail ann an Glaschu agus Inbhir Nis, le sgioba FilmG a’ taisbeanadh an cuspair beòthail aca, Buidhe, do luchd-inntrigidh.

Thuirt Manaidsear Pròiseict FilmG, Murchadh MacSuain: “Tha Film-G a-nis beò, agus tha sinn a’ coimhead airson filmichean a tha buidhe ann an dòigh sam bith as urrainn dhuinn, a bharrachd air an òran Coldplay a chleachdadh. Tha casg air sin!

“Tha sinn an dòchas am FilmG as fhèarr fhaicinn am-bliadhna agus tha sinn air bhioran leis na beachdan  sgoinneil a chuala sinn an t-seachdain-sa aig na tachartasan againn.

Chruinnich daoine cruthachail òga na Gàidhlig, luchd-cruthachaidh susbaint mheadhanan sòisealta agus seann luchd-inntrigidh FilmG aig Basta Pizza ann am Partaig oidhche Mhàirt airson tachartas co-obrachaidh, prìomh amas aig Fèis FilmG na bliadhna-sa – gus na puingean eadar cruinneachadh sgilean, tàlant agus bheachdan a cheangal ri chèile.

An làthair aig an tachartas bha Lana Pheutan, sgrìobhadair/cleasaiche, preasantair leantalachd a’ BhBC agus a bha na buannaiche FilmG ron seo: “Bha e math tighinn còmhla gus bruidhinn ri daoine a tha air pàirt a ghabhail ann am FilmG thairis air na bliadhnaichean ach cuideachd airson coinneachadh riuthsan a tha ga dhèanamh airson a’ chiad turas.”

“Tha mi air leth toilichte a bhith nam oide a-rithist agus a bhith a’ cuideachadh an ath ghinealach de dhaoine òga a tha a’ dèanamh fhilmichean oir bha FilmG cho cudromach air an t-slighe agam fhìn!”

Ghabh sgoilearan aig Acadamaidh Rìoghail Inbhir Nis an uair sin pàirt anns an tachartas co-obrachaidh aca fhèin, a’ dol an sàs ann an cuspair ùr FilmG agus a’ roinn am beachdan agus am brosnachadh fhad ’s bha iad a’ dealbhadh nam filmichean aca.

Mar phàirt den fhèis FilmG, bidh bùthan-obrach sna sgoiltean a’ gabhail àite air feadh na h-Alba. Thathas an dùil tuilleadh thachartasan co-obrachaidh ann an diofar raointean, uile a’ tighinn a-steach do cho-fharpais FilmG agus an cuirm dhuaisean aca sa Ghearran.

Tha farpais FilmG ag amas air an dà chuid daoine fo aois 18 (Òigridh) agus an fheadhainn a tha nas sine na 18 (Fosgailte), le 17 roinnean sònraichte uile gu lèir, agus am-bliadhna bidh luchd-dèanamh fhilmichean air an comharrachadh airson an tùsachd, an cruthachalachd agus airson an iomairt fhèin.

Tha roinnean ùra agus ath-leasaichte ann am-bliadhna, a’ toirt a-steach nan duaisean ùra Rionnag na Bliadhna (Òigridh) agus Gnìomhachas (Fosgailte), a tha ag amas air an ath rud mòr a lorg anns na meadhanan, agus tha na duaisean Dealbhadh Riochdachaidh (Òigridh) agus Cruthachalachd (Fosgailte) ann a dh’fhaodadh duais a thoirt dhaibhsan a nì filmichean a tha a’ leantainn a’ chuspair Buidhe.

Tha an cuspair Buidhe na iomradh air branndadh traidiseanta FilmG a tha tarraingeach do FilmG, agus am-bliadhna thathar ag iarraidh filmeadairean feuchainn ri filmichean a chruthachadh a bhios a’ gabhail a-steach buidhe gu cruthachail.

Tha na riaghailtean uile air am foillseachadh air làrach-lìn FilmG, ach tha e sìmplidh – cruthaich film Gàidhlig, cùm fo chòig mionaidean e, agus faigh a-steach e ron cheann-latha (9 Dùbhlachd 2022).

Thuirt Stiùiriche Ro-innleachd is Cùisean Taobh a-muigh MG ALBA, Ealasaid Dhòmhnallach: “Tha foillseachadh FilmG an-còmhnaidh na phrìomh thachartas aig MG ALBA, ach tha e rud beag sònraichte am-bliadhna agus sinn a’ comharrachadh 15 bliadhna den fharpais.”

“Tha e air a thighinn air adhart thar nam bliadhnaichean gus aire a thoirt do na h-atharrachaidhean ann an àrainneachd nam meadhanan aig astar luath agus tha sinn uile a’ coimhead air adhart ri bhith faicinn dè an t-susbaint mac-meanmnach is inntinneach a bhrosnaicheas an cuspair Buidhe.”

Airson liosta iomlan nan roinnean fhaicinn agus airson filmichean a chur a-steach gu FilmG, tadhail air www.filmg.co.uk no cuir fios chun sgioba aig Astar Media tro filmg@astarmedia.scot