Tha FilmG a’ tilleadh airson an 18mh bliadhna le clàr-ama eadar-dhealaichte agus roinnean ùraichte

Tha FilmG, farpais bhliadhnail nam filmichean goirid Gàidhlig, air ais airson an 18mh bliadhna le sealladh ùr dàna agus clàr-ama ùraichte airson a’ cho-fharpais.

Le filmeadairean mar as trice a’ cur a-steach tràth san Dùbhlachd, bidh FilmG fosgailte do thagraidhean am-bliadhna gu deireadh a’ Ghearrain.

Tha sin a’ fàgail trì mìosan airson filmichean a leasachadh, a chlàradh agus a dheasachadh, a’ toirt gu leòr ùine do chom-pàirtichean ùra agus do chom-pàirtichean a tha a’ tilleadh gus na beachdan aca a thoirt beò.

Às dèidh soirbheachas cruth na bliadhna an-uiridh, bidh saorsa cruthachail aig filmeadairean a-rithist, gun chuspair shònraichte sam bith air iarraidh orra, a’ leigeil le com-pàirtichean a bhith cleachdadh cuspair sam bith a tha gam brosnachadh.

Tha fiosrachadh mu cho-fharpaisean FilmG na bliadhna seo ri fhaighinn air làrach-lìn eadar-amail FilmG, le dùil ri làrach-lìn ùr FilmG a dh’aithghearr. Bidh siostam inntrigidh ùr airson FilmG cuideachd ri fhaotainn nuair a tha an làrach-lìn ùr beò.

Tha ìre ùr airson -12 air tighinn a-steach gus aire a tharraing air an tàlant as òige a tha a’ tighinn am bàrr, agus tha sgioba FilmG cuideachd air fiosrachadh fhoillseachadh air an làrach-lìn mu na roinnean ùra anns na farpaisean -18 agus 18+, le bliadhna air leth eile an dùil airson a’ phròiseict fhilmichean goirid.

Thuirt Murchadh MacSuain, Stiùiriche Pròiseict FilmG aig Astar Media: “Thairis air an  trì FilmG mu dheireadh, tha sinn air còrr is 100 film fhaicinn air an cur a-steach gach bliadhna, agus mar sin tha sinn airson cumail oirnn a’ cuideachadh filmeadairean Gàidhlig a bhith a’ dèanamh cliù dhaibh fhèin.”

“Tha FilmG àrd-amasach ach an-còmhnaidh ruigsinneach. Ma tha sibh airson film a dhèanamh, no ma tha sibh airson obair fhaighinn anns na meadhanan, tha sinn an seo gus taic a thoirt dhuibh.”

Tha bùthan-obrach a’ tachairt ann an àrd-sgoiltean air feadh Alba, a’ toirt cothrom do dhaoine òga ionnsachadh mu bhith a’ cruthachadh fhilmichean, a’ togail eòlas practaigeach, agus a’ faicinn am pròiseas riochdachaidh agus a’ tuigsinn na tha còrdadh riutha. Faodaidh sgioba FilmG taic fa leth a thabhann cuideachd do dh’fhilmeadairean de gach aois a tha ag iarraidh a bhith an sàs.

Thuirt Magaidh Nic an Tàilleir, Ceannard Foillseachaidh aig MG ALBA, leis a bheil FilmG: “Tha FilmG deatamach ann a bhith a’ brosnachadh an ath ghinealach de luchd-cruthachaidh Gàidhlig. Bidh na guthan agus na beachdan aca a’ cumadh àm ri teachd nam meadhanan Gàidhlig.” 

“Tha sinn air aghaidhean ùra fhaicinn a’ nochdadh gach bliadhna le mar a tha na h-àireamhan a bhios a’ gabhail pàirt air fàs, agus tha barrachd farsaingeachd de fhilmichean de gach seòrsa air an ainmeachadh agus a’ buannachadh dhuaisean; mar sin, tha FilmG na bliadhna seo a’ gealltainn comas.”

Thèid geàrr-liostaichean farpais FilmG fhoillseachadh as t-earrach, agus thèid na buannaichean ainmeachadh tràth san t-samhradh.

Faodaidh filmeadairean no buidhnean a tha airson tòiseachadh fios a chuir gu sgioba FilmG aig Astar Media airson taic.